阿叻： 股票係印嘅唔係買！

從香港討論區讀到這篇東西，幾過癮：


綽號「阿叻」的陳百祥，表面上是一位娛樂圈的演藝人，以演藝生活為正職。但事實上，他是個精通股票的投資人。70年代已投身期貨炒賣，開始涉足投資市場，之後投身娛樂圈，但卻從沒有離開過投資界。曾將公司上市、賣盤，又曾任多間上市公司的顧問，近期更開始協助公司上市。
原來阿叻對股市的熟悉程度，與娛樂圈不相伯仲。「股票係要印！唔係買！其實一直以來，我都在物色值得投資的上市公司，特別是細價股；然後會上門敲門，與管理層直接對話，看看大家有否合作空間；甚至收購間公司，當一盤生意咁做，所以我係印股票，唔係炒股票！」
娛樂圈中人稱「阿叻」的陳百祥，身兼多重身份，人所皆知。電視、電影、唱歌、主持，但原來他還是個精通股票的人。當大家以為他只如一般小股民般，買滙豐（00005）股票長揸時，其實他是四處物色上市公司，收購其業務，難怪他說，「股票印好啲喎！」
他認為股市是個隨時都充滿機會的地方，「只要你有夢想、遇啱機會，利用你的財技，吼中一間上市公司，你就有希望。當然我唔只希望中一間，而希望三穿七，好似如果你持有十間上市公司，以主板計，你點都有幾十億身家啦！所以我好鼓勵人哋上市。」
至於細價股，他更斬釘截鐵地說，「細價股唔使靠消息，因為只要我睇中你的idea，識得個莊，我梗係上門同你傾啦！其實咪又係一盤生意，我可以收購你間公司，同你一齊夾份做，咁咪唔係靠消息囉！當然小股民係無辦法知，所以咪要做功課囉！但我唔係小股民呀嘛！」
今時今日，阿叻已擁有多間上市公司的顧問經驗，部份更是股東身份，對股市可謂瞭如指掌。「我的資金大部份是用來投資股票，我唔會炒樓；因為股票快，回報快。」他說，「股市並非根據民生的遊戲，有政治家死唔代表股市會冧。其實股市基本上是一個大賭場，有對賭的成份存在。真正買股票的人，其實是在對賭，港股每日成交隨時過千億，如果你識的話，係一個好好的搵錢機會。」
而阿叻投資股票的方式，亦有別於一般人，「我成日想將啲生意注入上市公司，始終係印股票着數啲！因為你一開始，就跟這盤生意，知道它的前景！我而家都成日幫朋友嘅公司，睇吓可否上市，幫到別人又分到股份，呢啲就最好！」

膽大心細 低買高沽
作為小股民，投資股票時，阿叻認為最重要是膽大心細。他的格言是「當所有人都看淡股市時，才是入市之時。當李兆基（四叔）話個市升到三萬點時，你就要快點走！別人恐慌時，你就要冷靜。」事實上，他個人也緊守着這個原則。
09年滙豐宣布「世紀大供股」計劃，股價曾一度插水至33元，創出近14年的新低，而當時每份供股權價值，亦下瀉至最低僅值3.53 元，加上28元供股價，每股只需31.53元。「當時我發現滙豐係歷史新低，無得輸㗎！滙豐NAV都值90元，33元邊有得輸？我當時翻看一下，鄭海泉（前滙豐中國董事長）都係得30萬股，於是我就買入30萬股供股權，加上供股價，平均每股大約只係33元，用不足1,000萬就可以同鄭海泉揸相同股數，你話幾抵！」阿叻指持股至今，一直未有沽貨，之後滙豐股價曾一度升至98元，帳面賺近2,000萬，即使近期股價回落，亦穩賺過千萬元。個人投資方面，他會做基本分析，計NAV，睇啱時機才入市，但強調適當時候要沽貨。
一向給人感覺賭錢很叻，經常贏3T的阿叻，究竟是以賭博的心態去投資，還是以投資的心態去賭博？
「其實兩者互相影響的，因為你無賭博的心，你就不會夠膽買嘢！」他笑說，「股市是一個數字遊戲，你唔識計數，點贏錢呀？同賭馬一樣，你唔知道3T係4,800萬份之一的機會，盲目咁去買10元，梗係輸啦！唔識計馬的血統、場地、風向，點會贏錢？股票都一樣，只要你條數計得啱就唔係賭博，當你掌握到數字，呢啲叫做投資！投資係有Return（回報）架嘛！當然風險愈大，Return亦愈大。」

25歲破產 只有股市可翻身
不說不知，大家認識的阿叻，並非單單是演藝界人士。其實他一直以來都是股市中人。「我71年已經加入大亞證券行，任職期貨買賣員，我所有嘅經驗都係實踐返來。當時第一個客就係羅文，佢俾咗3萬元我幫佢炒期指，咁當然有幫佢賺到錢，但對我來說，都係搵唔到大錢的工作。」
不甘於打工的他，72年便毅然加入製衣廠，第一次做生意。全盛時期有三間廠、七部車，74年公司總資產已經超過千萬元，但最後因為擴張過度，欠下銀行巨債，結果75年要申請破產，當年他只有25歲。由無變有，再由有變無。但這一役亦令他認識到向銀行借錢是永遠無發達，「如果當時我識股票，就唔會向銀行借錢，因為只有在股市上集資，先唔會破產；我亦都話俾自己聽，我以後所有嘅生意都一定要上市。所以我直至今日，都唔會再向銀行借一毫子，就算買物業都無向銀行借過錢。」
阿叻的演藝生涯，亦自其生意失敗後開始。他在78年底加入無線電視，先拍電視劇，包括《青春熱潮》等，同時主持《歡樂今宵》及演出各大小綜合節目。82年開始參與電影，曾演出《花心大少》、《青蛙王子》等極賣座的港產片；其後活躍於演藝圈，並以主持為主。雖然在演藝界甚吃得開，亦令他賺到豐足的財富，但本身對於股市非常熟悉的他，並沒有放棄股市。「其實，我進軍娛樂圈時，本來打算做歌星。當時我就同譚詠麟講，唱歌係唔會發達，當然佢而家發咗達，但呢個世界得一個譚詠麟啫！嗱！當時羅文最紅啦！嗰時無紅館，佢喺利舞臺開一場演唱會，賣20元一張票，坐滿都係1,000人，唱到喉嚨爆埋都唔會發達啦！」

幫朋友變印股票
83年他遇上好友黃創山，當時黃的上市公司華基泰（00155現稱華基光電），代理puma運動品牌，他靈機一觸，想到邀請球王比利與當時紅極一時的來港巨星鍾楚紅Crossover拍廣告，結果令puma品牌大熱，將puma變成fashion，亦令阿叻初次參與上市公司的業務而賺取到第一桶金。之後，再拍上好友曾志偉和譚詠麟，與黃創山合資搞天天漁港，令他加入了上市公司「印股票」的行列。不過，阿叻指，兩盤生意並未令他賺到盤滿缽滿，因為當時太多股東。88年，他再與姐夫簡文樂，即冠軍科技（00092）主席，合作生產及推廣第一部中文傳呼機，這樣才令他真正嘗到「印股票」帶來的豐收利潤。
自此，他身兼演藝界紅人之餘，亦繼續物色公司，延續其上市夢。99年，阿叻再戰江湖。與曾志偉、譚詠麟三人聯同一眾巨星，成立了演藝公司東方魅力，最後更成功借殼上市。「當時有咁嘅idea，係因為我睇到電影可以向國內發展，但未必個個演員都可以國際化，於是我哋就以私人集資的形式，每股6.6萬元，成功邀請咗65個artist入來，決定成立自己的公司。當時的股東都幾得意，最大股是鄧兆尊、鄧兆榮兩兄弟，最小是王敏德，只付了3,300元，梅艷芳更是分文不出。她並非無錢，只是想支持我們，被邀請加入的。」結果成功集資到1,400萬，做了年多兩年，遇上dot com年代，就順理成章計劃上市。

創立東魅　正式上市
最後，找來陳國強借DC財務的殼成功將東方魅力上市（當時編號：00198）。「本來我哋找了另一間公司，所有條件傾好哂，佢地又找來了很多計數好叻的人來，話我哋唔值咁多錢；即係先買咗我地個份，然後再上市『骨水』。我覺得咁樣好無道義。」結果，一次與老友陳國強飯聚時，無意中與他提起這件事。「佢二話不說，立即付上1,400萬元，他佔49%，我哋佔51%，成功將公司上市。」
東魅上市後，市值由1,400萬，升至高峰期的30億；股價由上市時的0.7元最高升至3.5元，帶挈一眾藝人無本生利兼大賺。阿叻指出，「呢啲唔係賭博。你係要有財技，先可以將生意變到咁大。」不過，東魅最後因經營不善，在陳國強拉攏下，由有「內地第一富豪」之稱的覃輝經營的「星美集團」收購，畫上完美的句號。阿叻解釋，公司失敗乃因步伐太快。「當時器材、機器落後到不能想像，配合唔到。而家你睇到阿里巴巴（01688）主席馬雲咪行得啱囉！因為佢行得慢呀嘛！而家有微博呀、facebook、google咁，成個社會配合到，其實佢都係行緊我哋以前嘅路。」
經驗豐富的阿叻，於02年出任永安旅遊（01189現為珀麗酒店控股）執行董事，為公司的旅遊及酒店業務作顧問，因為這些都是他熟悉的業務，因此以執董形式出任，亦是目前唯一一間上市公司的董事。
行啱灰色地帶 好易發達
現時，阿叻仍主力物色值得投資的上市公司，「好似細價股，最好就係印啦！如果我睇好它的業務，我會敲門見管理層同佢哋傾，知道晒佢嘅方向係咩！呢啲係機會來嘅！」阿叻表示，自己每天都在訓練自己。「好多人識做生意，但唔識上市，只要你的企業有三年盈利，業務本身好，就可以上市。好似我最近睇緊韓國一間新能源公司，計劃幫佢哋上市。一單市值百多億元啦！做一、兩單咪勉強夠生活囉！」他更笑說，「我除咗對女人唔花心外，對其他嘢好花心，三年就一小變，五年就一大變，要隨着市場變化而投資，邊度有錢賺我就去邊。」
他認為，當你增值自己，樣樣都認識時，機會來的時候，你就可以發揮到最大。「機會就好似流星咁，在你頭頂上兩呎，當佢一飛過，你唔跳就無；但你要好勤力不斷咁跳，可能會有一粒飛過來。」「做任何生意都係計數，你數啱就得架啦！股票係可以大家一齊賺，例如我做好多生意，有基金買我，個PE乘咗上去，我咪拎出來同股民大家分囉！你睇好我，就投資落來，我賺到錢嘅，咪派股息比你囉！」
至於他怎樣看香港與國內股市的投資機會，阿叻說：「在國內擁有100億（現金）都不及香港有10億，因為香港有自由，透明度高，監管好嚴格，保障大股東亦保障股民。香港是一個褔地，股市有監管、有法治，只要你唔好犯法，行啱個條灰色地帶，想發達好容易。」


——————————————————————————–
師傅莊永昌 賭而優則股
股市場外，阿叻賭馬叻，亦是眾所皆知。「我喜歡賭馬，係因為有種『眾人皆醉我獨醒』的感覺，而賭馬亦是我放最多時間學習，最投入的興趣之一，而且也是一個很大的收入來源。」
一向樣樣認叻的他，原來也有令他佩服的人，這就是他稱「師傅」的莊永昌。「佢真係好叻，聽聞佢副身家主要都係從賭馬贏返來。」馬評人余伯樂亦曾說：「莊永昌是職業賭徒，佢靠分析馬匹磅數等數據去賭馬，唔入馬場嘅，聽聞佢試過有一季贏過億元！」
阿叻說，「但佢炒股更勁，我相信佢賺嘅錢係賭馬一個double（雙倍）。因為佢當年係做全香港最大的『閒』，我記得94年有一日當全香港『冧棚』（大瀉）的時候，全港投資者都睇跌，期指得1,600張成交，我同佢兩個人，揸住1,300幾張，揸咗全港八成的期指。即係全香港得我哋兩個人睇好，結果當然大賺！有咁勁的人，你點解唔跟佢學。」「永遠當全世界『冧棚』的時候，我哋就去做呢啲嘢，所以話你要心水好清，好夠膽先可以做得到。」
阿叻說，莊永昌計數勁，所以話所有嘢都係計數，佢勁到可以破解百家樂，他現時在美國（拉斯維加斯）被列作不受歡迎人物，不準他入場。因為他第一天入賭場，用了100美元，就贏了50萬美元，第二天再贏100萬美元；澳門賭場就勸他不要入場。阿叻說，「呢啲就係數字，並非賭，當你識計數，就不是賭。」他最近玩最流行的texas poker，學了半年，就成了亞洲三甲，每場都贏幾百萬元。
不過，阿叻指莊永昌永遠不認識上市公司主席，只是熟讀所有資料，分析完後才入市。他買的股票，都是大賺。但阿叻坦言，師傅也有失手時，就是他持有美麗華股份（00071），更成為單一大股東，但那是唯一無return的股票，原因他只是為了拗氣。「拗氣就最傻，『氣』字下面是個『米』字。你拿走個『米』就變『乞米』囉！當年1993年6月30日，大股東以每股17多元去收購，但他為了拗氣，私有化無望了，如今股價只有9元多。但他為啖氣，至今仍繼續持有該股。」