有着數，咪走雞

經濟麻麻，加上自己向來鍾意留意啲着數嘢，不如喺度同大家分享一下，實行與眾同樂！

喺1月31 日﹙無錯，就嚟截啦﹚前用VISA喺單一收據上簽帳滿300蚊﹙港紙或澳門幣﹚，就可以上visa.com.hk或致電3750-8000﹙但我發覺電話真係好難打得通，大家要就一就時間晨早或者好夜打去先會易啲﹚登記抽獎，即有機會贏取最高五十萬的簽帳額！結果唔駛等好耐，將會喺2月11日公佈。請留意，舊年11月24日之後的消費都用得，所以幾時都話，買嘢最緊要保留收據！

第2壇嘢關恆生信用卡卡主事。如果你喺單一收據上簽帳滿500蚊港紙，就可以打熱線2998-6000登記抽獎，贏取Cash Dollar﹙最少會有5蚊，會即時知﹚，聽講呢個活動就嚟完﹙廣告都愈嚟愈少﹚，各位咭主要快啲手啦！

最後仲有一樣，就係港鐵抽獎，如果你用八達通搭港鐵，就可自動參加大抽獎，有機會贏取500蚊百佳禮券，但係個結果會耐啲，響3月13日先喺mtr.com.hk公佈中獎者的八達通卡號碼。不過同時間亦可以儲埋MTR的Bonus point，換古巨基賣廣告果個系列的東西﹙車飛最好，唔駛加錢﹚。

講住咁多先，有新筍嘢再通知大家！